தேவையற்ற வங்கிக் கடன் அழைப்புகள் எப்படி தடுப்பது

தேவையில்லாமல் உங்கள் மொபைலுக்கு வரும் வங்கிக் கடன் தொடர்பான அழைப்புகளை தடுக்க சில வழிமுறைகள் இருக்கிறது.

தேவையற்ற அழைப்புகளை தடுக்கும் வழிகள்
ரிசர்வ் வங்கி இதை தடுக்க முடியாது என்று சொல்கிறது
தொலைத்தொடர்பு நிறுவனங்கள் இதற்கான வழிகளை ஏற்படுத்தியுள்ளது

பெரும்பாலான மொபைல் பயனாளர்களை எரிச்சலைடைய செய்வது தான் இந்த வங்கிக் கடன் தொடர்பான அழைப்புகள். தேவை இல்லாதபோதும், நாளுக்கு இரண்டு அழைப்புகள் என்ற ரீதியில் இந்த மார்க்கெட்டிங் அழைப்புகள் நம்மை வந்து தொல்லை செய்வதுண்டு. இது போன்ற அழைப்புகளை சில செயலிகள் கொண்டு தடுத்தாலும், புதிய தொலைப்பேசி எண்களைக் கொண்டு மீண்டும் நம்மை தொல்லை செய்வது இவர்களுக்கு வாடிக்கையாகிப் போனது.

இவ்வாறு வரும் அழைப்புகள், வியாபார உத்தியாக தான் பார்க்கமுடிகிறது. கடன் பெறுபவர்கள் தான் கவனமாக இந்த அழைப்புகளை கையாள வேண்டும். கடன் தேவை இல்லையென்றால், இதுபோன்ற தொலைப்பேசி எண்களில் இருந்து வரும் அழைப்புகளை துண்டித்துவிடுங்கள். இதற்கு தடையெல்லாம் விதிக்க முடியாது என்று ரிசர்வ் வங்கியும் இந்த விவகாரம் குறித்த கேள்விக்கு செவி சாய்க்காமல், ஆலோசனை கொடுத்துவிட்டு சைலண்டாக இருந்துவிட்டது.

இதனால் மன உளைச்சலுக்கு ஆளான நபர்களுக்கு இது மேலும் எரிச்சலூட்டியுள்ளது. இது இப்படியிருக்க, தொலைத்தொடர்பு நிறுவனங்கள் இதுபோன்ற அழைப்புகளை தடுப்பதற்கு சில வழிகளை வகுத்துள்ளனர். அவை குறித்து நீங்கள் அறிந்து வைத்திருப்பது மிக அவசியமாகும். சரி, அப்படி என்ன வழிகளை தொலைத்தொடர்பு நிறுவனங்கள் வகுத்து வைத்துள்ளது என்று பார்க்கலாம்.

உங்களுக்குத் தேவைப்படாத வணிக அழைப்புகளை பெறாமல் இருக்க, உங்கள் லேண்ட்லைன் அல்லது மொபைலில் இருந்து 1909 (இலவச அழைப்பு) என்ற எண்ணை அழைத்து உங்கள் விருப்பங்களைத் தேர்ந்தெடுக்கவும். 'START DND' அல்லது 'START 0' ஐ 1909 என்ற எண்ணுக்கு SMS அனுப்புவதன் மூலம் தேவையற்ற அழைப்புகளை தடை செய்யமுடியும்.

தேர்ந்தெடுக்கப்பட்ட பிரிவில் உள்ள வணிக அழைப்புகளை மட்டும் பெற கீழ்காணும் வழிமுறைகளைப் பின்பற்றவும். விருப்பங்கள் நீங்கள் தேர்வு செய்வதாக இருக்க வேண்டும். எடுத்துக்காட்டாக கல்வி சார்ந்த அழைப்புகள் மட்டும் கிடைக்க வேண்டுமென்றால் 'START 3' என்று டைப் செய்து 1909 என்ற எண்ணிற்கு SMS அனுப்பவும்.

முறையே தேர்வு செய்ய 7 விருப்பங்கள் உள்ளன

'START 0'- முழுமையாக தடுக்க (Fully blocked)
'START 1'- வங்கி, காப்பீடு, நிதி மற்றும் கடன் அட்டைகள் (Banking, Insurance, Financial products and credit cards)
'START 2'- ரியல் எஸ்டேட் (Real Estate)
'START 3'- கல்வி (Education)
'START 4'- ஆரோக்கியம் (Health)
'START 5'- நுகர்வோர் பொருட்கள் மற்றும் வாகனங்கள் (Consumer goods and automobiles)
'START 6'- தொடர்பு, ஒளிபரப்பு, பொழுதுபோக்கு மற்றும் தகவல் தொழில்நுட்பம் (Communication, Broadcasting, Entertainment and IT)
'START 7'- சுற்றுலா (Tourism and Leisure)

நீங்கள் SMS வாயிலாக பதிவு செய்ததை நீக்க 1909 என்ற எண்ணுக்கு அழைக்கலாம் (கட்டணம் இலவசம்) அல்லது STOP DND என்று டைப் செய்து 1909 என்ற எண்ணுக்கு SMS அனுப்பவும். இவை வழிமுறைகள் பின்பற்றினால் கூட, சில நேரங்களில் உங்களுக்கு அழைப்புகள் வரலாம். ஆனால், நீங்கள் தற்போது அனுபவித்துக்கொண்டிருக்கும் அளவிற்கு அது உங்களை வருத்தாது என்று நம்புகிறேன்.